HOW TO

ပုဇွန်ချဉ်

ပါဝင်သောပစ္စည်းများ
1. ပုဇွန် ၁၅၀ ဂရမ်
2. ထမင်းကြမ်း ၈၀ ဂရမ်-၁၀၀ ဂရမ်
3. ဆား ၁ ၁/၂ လက်ဘက်ရည်ဇွန်း
4. ဌက်ပျောဖက် ၄ ရွက် (၁၀ x ၈ လက္မ )
5. ပလပ်စတစ် အိပ် သို့မဟုတ် wrapper

ပြုလုပ်နည်း
1. ပုဇွန်ကို အခွံချွတ်ပီး ခေါင်းဖြုတ်ပါတယ်။

2. ရေနဲ့ ၂ ပြန်လောက်ဆေးပီး ရေစစ်ပါတယ်။ ရေဆေးတဲ့ အခါ ပုဇွန်ဆီတွေ လုံးဝ ပြောင်စင်သွားရပါမယ်၊
ဆားကြမ်းနဲ့ (Kosher salt) ၂ မိနစ်လောက် နာနာ နယ်ပီးရင် စက်ထဲမှာ ညက်ပီး စီးလာအောင် ကြိတ်ပါတယ်။

3. ကြိတ်ထားတဲ့ ပုဇွန်ကို ခပ်မာမာ ချက်ထားတဲ့ ထမင်းကြမ်းနဲ့ နယ် ပေးတယ်၊
ပလပ်စတစ်အိပ် အသစ်ထဲ လေမခိုအောင် ဖိသိပ်ထည့်ပီး သွားကြားထိုးတံနဲ့ အိပ်ကို အပေါက်ဖောက်ပေးထားတယ်။
ပလပ်စတစ်အိပ်ရဲ့ အပြင်ဘက်ကနေ ငှက်ပျောဖက်နဲ့ ၃-၄ ထပ်လောက် တင်းတင်းကြပ်ကြပ်ထုတ်ပီး နှီး
သို့မဟုတ် သားရည်ပင်နဲ့ တင်းတင်းကြပ်ကြပ် စီးပါတယ်၊

4. ပုဇွန်ထုတ်ကို လေးတဲ့ အရာနဲ့ဖိထားလိုက်တယ်၊ နွေးပီး ခြောက်သွေ့ သန့်ရှင်းတဲ့နေရာမှာ ထားတယ်၊
အချဉ်ပေါက်လာတဲ့ အခါ ထမင်းတွေ ကြေသွားပီး အရည် ထွက်လာတယ်၊
ဖိထားတာကြောင့် ရေတွေ စစ်ထွက်သွားတော့ မာမာလေးဖြစ်လာမယ်၊

5. အခန်း အပူချိန် ၈၀ ကနေ ၉၀ံ F ရှိရင် ၃ ရက်လောက်ဆိုအချဉ်ပေါက်ပါပီ၊
ချက်ခြင်း မစားသေးရင် အချဉ်စူးမသွားအောင်ေ၇ခဲသေတ္တာထဲ ထည့် သိမ်းပါ။

သိစေချင်တာလေးတွေ…
သန့်သန့်ရှင်းရှင်း မကိုင်တွယ်ရင်..
အသုံးပြုတဲ့ ပစ္စည်းတွေ မသန့်ရင်..
အချဉ်မပေါက်ဘဲ မှိုတက်သွားတာ၊
ပုတ်သွားတာမျိုးဖြစ်တတ်ပါတယ်။
iodine ပါတဲ့ ဆားကို မသုံးရပါ။

Chaw Su's Food Friends
သဘာဝ ပုဇွန်ချဉ်
သဘာဝ ပုဇွန်ချဉ် အတွက် လိုအပ်တာလေးတွေ…

1. ခေါင်းဖြုတ်ပြီး အခွံမခွါထားသော ပုဇွန်ဆိတ် – 250 g
2. ထောင်းထားသော ကြက်သွန်ဖြူ – ထမင်းစားဇွန်း ၂ ဇွန်း (သို့) ၁ ဇွန်းခွဲ
3. မပျော့လွန်း၊ မမာလွန်းသော
ချက်ထားသည့် (သို့) ပေါင်းထားသည့်
ကောက်ညင်း – ထမင်းစားဇွန်း ၂ ဇွန်း
4. ဆား – လက်ဖက်ရည်ဇွန်း တစ်ဝက်

ခေါင်းဖြုတ်ပြီး အခွံမခွါထားသော ပုဇွန်ဆိတ်လေးများ ကို
ရေဆေး၊ ရေစစ်ပြီးလျှင် tissue towel များဖြင့်
ဖွဖွလေးဖိကာ ရေတတ်နိုင်သမျှခြောက်အောင်လုပ်ထားပါ။
(ရေခြောက်ဖို့လိုပါတယ်။)

ပုဇွန်များရေခြောက်လျှင် ကောက်ညင်း၊ ကြက်သွန်ဖြူ နှင့်
ဆားကိုထည့်ကာ အိပြီးစေးလာအောင်
ရေဆေးပြီးခြောက်အောင်သုပ်ထားသော လက်ဖြင့်
၇ မိနစ်ခန့် ဖိဆုပ်ပြီး နာနာနယ်ပေးပါ။
(စေးစေးလေးဖြစ်ဖို့ပြောသလို နယ်ပေးဖို့ လိုပါတယ်ရှင်။)

အိပြီးစီးလာလျှင် သန့်ပြန်သော ပလတ်စတစ်ဗူးထဲ ဖိပြီးထည့်ကာ
အဖုံးလုံအောင်ဖုံးပြီး အခန်းအပူရှိန်အများဆုံးနေရာဖြစ်သော
မီးဖိုချောင်ထဲတွင် ၃ ရက်ထားပါ။ (နေပူမလှမ်းပါနှင့်။)

တစ်ရက်ပြည့်ပြီးနောက် အရောင်စပြောင်းကာ၊
အရည်အနည်းငယ် ထွက်လာပါမယ်။

၃ ရက်မြောက်နေ့မှာတော့ အနှံ့မွှေးလာတဲ့
ပုဇွန်ချဉ်လေးတွေထဲမှ ထွက်လာသော အရည်အနည်းငယ်ကို
ဇွန်းဖြင့်ဖိ၍ သွန်ပစ်ပြီး ကြိုက်နှစ်သက်သလို သုံးဆောင်နိူင်ပါပြီ။
(ချက်ချင်းမစားနိူင်သေးလျှင် အရည်သွန်ပြီးနောက်
အဖုံး ဖုံးကာ ရေခဲသေတ္တာထဲ ၅ ရက်ခန့် သိမ်းထားနိူင်ပါတယ်။)

ရာသီဥတု အပူအအေးပေါ်မူတည်ပြီး ရက်အတိုးအလျှော့ရှိပါတယ်။

&&&&&&&&&&&&&&&&&&&&&&

Excellent- Foods Corner
by Moe Wai
ပုဇွန်ချဉ် လုပ်နည်း
----------------------

ပုဇွန်ချဉ်လုပ်ဖို့အတွက် အခွံပါးပြီး ချိုတဲ့ white prawn ကို ၀ယ်ပါတယ်။
ကျမကတော့ ပုဇွန်ခေါင်းကို အကုန်မဖြုတ်ပစ်ပဲ
ခေါင်းထိပ်က အချွန်တွေ အမျှင်တွေကို
ကတ်ကျေးနဲ့ ညှပ်ပစ်လိုက်ပါတယ်။
ပုဇွန်တွေ အားလုံး ခေါင်းထိပ် ညှပ်ပီးသွားရင်
ခဏလောက် ရေစစ်ထားလိုက်ပါတယ်။

ပုဇွန် တစ်ကီလို (၆၀ သားလောက်) ကို
ဆန်တစ်ဗူးစာ ချက်ထားတဲ့ ထမင်းနဲ့
ဆား စတီးဇွန်း ၂ ဇွန်းခွဲလောက်နဲ့ ရောနယ်တာပါပဲ။
နယ်ရင်းနဲ့ ပုဇွန်ခေါင်းထဲက ပုဇွန်ဆီတွေနဲ့
ထမင်းနဲ့ ထိတွေ့သွားတဲ့အနံ့လေးက တော်တော် မွှေးတာပါ။
ပုဇွန်လဲ မကျေရအောင် ဆုပ် ဆုပ်ပြီး နယ်ပါတယ်။
နယ်ပြီးသွားရင် သိပ်မယ့်အိုးထဲ ခပ်သိပ်သိပ်လေး ထည့်။
ကျမကတော့ ရှိတဲ့ ပလတ်စတစ်ပုလင်းထဲ ထည့်ပါတယ်။
ထည့်ပြီးပြီဆိုရင် ကျွတ်ကျွတ်အိတ်အသန့်တွေကို
အပေါ်ကနေ ထိုးသိပ်ထည့်လိုက်တာပါပဲ။

နောက် ကျွတ်ကျွတ်အိတ်တွေအပေါ်ကနေ
ပုလင်းအ၀နားမှာ တခါသုံး ၀ါးတူကို
ချိုးထည့်ပြီး ဂုပ်နှိပ်လိုက်တာပါ။
နောက်နေ့လောက်ဆိုရင် နယ်ထားတဲ့
ထမင်းနဲ့ ပုဇွန်တွေကနေ အရည်လေးတွေ
စထွက်လာပါမယ်။
အဲဒီအချိန်လောက်ကျရင် ပုလင်းကို အောက်ကနေ
စကာလေး ဇလုံလေးခံပြီး မှောက်ထားလိုက်တာပါပဲ။

အရည်တွေက တစိမ့်စိမ့် ကျနေပေမယ့်
ကျွတ်ကျွတ်အိတ်တွေ ခံထားပြီး
ဝါးတူနဲ့လဲ ပိတ်ထားတာမို့ နယ်ထားတာတွေ မထွက်ကျပါဘူး။
၂ ရက်လောက်ဆို စ ချဉ်ပါပြီ။
အပြင်မှာ ၃ ရက်နဲ့အထက် ရက်ကြာကြာ ထားမိရင်
အချဉ်စူးပြီး အနံ့ကလဲ ကစော်နံ့ ပေါက်တတ်ပါတယ်။
ကျမကတော့ ၂ ရက်လောက် စချဉ်ပြီဆိုတာနဲ့
ရေခဲသေတ္တာထဲ (ရေခဲခန်း မဟုတ်) ထည့်ထားလိုက်ပါတယ်။
အအေးဓာတ်နဲ့ အချဉ်ကို ထိန်းထားတော့
ရက်ကြာလဲ ကွာလတီ မပြောင်းပါဘူး။

ထမင်းကအပူလား၊ အအေးလားဆိုတော့
အရမ်းအပူကြီးနဲ့ မလုပ်ပါဘူး။
ကိုင်သာရုံ ခပ်နွေးနွေးနဲ့လဲ ရပါတယ်။
ထမင်းကြမ်း၊ ထမင်းအေးနဲ့လဲ လုပ်လို့ရ။
===
ကြိုက်ရာ ငါးကြီး ငါးသေး ငဖယ် ပုဇွန်ထုတ် ပုဇွန်ကျော့
အချဉ်တည်နည်း အကုန်လုပ်နည်းတူတူပဲ
ငါးကြီးရင် သင့်လျှော်အောင်တုံးပေးပါ။  ။